Здружението на граѓани ИНСТИТУТ ЗА РАЗВОЈ НА БЕЗБЕДНОСТ – ЕВРОПСКА ПОЛИЦИСКА АСОЦИЈАЦИЈА – МАКЕДОНИЈА – СКОПЈЕ на собранието одржано на 3.7.2025 изгласа и донесе нова платформа и програма за работа 2025-2029. 

Како невладино и непартиско здружение својата мисија ќе ја остварува преку следните:

     – Платформа;

     – Програма на активности на здружението.

 Платформа:

1. Подобрување на безбедноста во сообраќајот:
    Намалување на бројот на сообраќајни незгоди, загинати и повредени преку подигање на јавната свест за безбедност во сообраќајот, подобрување на сообраќајната култура и засилена контрола и превентивни мерки.

2. Зајакнување на владеењето на правото и демократските вредности:
    Промовирање и поддршка на политиките за владеење на правото, човековите права и транспарентноста во работењето на безбедносните служби и полициските институции во согласност со стандардите на Европската Унија.

3. Јакнење на капацитетите за борба против организираниот криминал и корупцијата:
     Развој на програми за обука, истражување и размена на добри практики помеѓу институциите за спроведување на законот во Северна Македонија, ЕУ и земјите кандидати, во областите на финансиски криминал, корупција и транснационален криминал.

4. Дигитална трансформација и сајбер-безбедност:
      Поддршка на имплементацијата на стратегијата на ЕУ за сајбер-безбедност, со особен фокус на подобрување на капацитетите за спречување и детекција на сајбер-закани и дигитални криминални активности.

5. Подобрување на полициската соработка и безбедноста на границите:
     Соработка и координација со европските мрежи и тела, како што се Европол, Фронтекс и други релевантни агенции, за подобра размена на информации, гранична контрола и управување со миграциските процеси.

6. Инклузивна и заедничка безбедност:
      Промовирање на родовата еднаквост, човековите права и анти-дискриминацијата во полициските и безбедносните служби, преку специфични едукативни активности.

Програма на активности:

1. Активности за подобрување на сообраќајната култура:
     Едукативни кампањи и обуки за учесниците во сообраќајот, фокусирани на почитување на правилата, безбедност на пешаците и велосипедистите, и посебни активности за безбедност во руралните средини при употребата на земјоделски машини и приклучна механизација.
   Соработка со локалните самоуправи и релевантните институции за подобрување на инфраструктурата и сигнализацијата за поголема сообраќајна безбедност.

2. Едукативни програми и обуки:
     Спроведување на специјализирани курсеви за јакнење на професионалните капацитети на полициските службеници и стручните кадри од областа на безбедноста, согласно европските практики и стандарди вклучително и преку достапните ЕУ програми.

3. Развој на истражувачки проекти и студии:
      Истражување и анализа на современите закани по безбедноста, вклучувајќи организиран криминал, сајбер-криминал и тероризам, и креирање на препораки за политики вклучително и преку ЕУ проекти.

4. Регионална и Европска соработка:
  Организација на регионални и меѓународни конференции, работилници и семинари за подобрување на регионалната и прекуграничната соработка помеѓу релевантните институции.

5. Проекти за дигитална трансформација:
      Имплементација на иновативни дигитални решенија и алатки за подобрување на ефикасноста и транспарентноста во работењето на полицијата, безбедносните служби подигајки ја безбедноста и едукација на граѓаните преку ЕУ проекти.

6. Кампањи за подигање на свеста:
     Спроведување на јавни кампањи и активности за информирање и подигање на свеста за важноста на превенцијата и борбата против криминалот, заштитата на приватноста и дигиталната безбедност меѓу граѓаните и во соработка со институциите во државата.